200ലധ ികം കിലോ മീറ്റര്‍ കാല്‍നടയാത്ര ചെയ്ത യുവാവ് വഴിയില്‍ വീണുമരിച്ചു
ന്യൂഡല്‍ഹി: ലോക്ക്ഡൗണ്‍ പ്രഖ്യാപിച്ചതോടെ ഡല്‍ഹിയില്‍ നിന്നും 200ലധികം കിലോമീറ്റര്‍ കാല്‍നടയായി യാത്രചെയ്ത യുവാവിന് ദാരുണാന്ത്യം. ഡല്‍ഹിയില്‍നിന്നും മധ്യപ്രദേശിലേക്ക് നടന്ന രണ്‍വീര്‍ സിങ് എന്ന 38 കാരനാണ് 200 കിലോമീറ്റര്‍ പിന്നിട്ടപ്പോള്‍ വഴിയില്‍ കുഴഞ്ഞുവീണ് മരിച്ചത്.
ഇയാള്‍ ഡല്‍ഹിയില്‍ ഡെലിവറി ഏജന്‍റായി ജോലി ചെയ്യുകയായിരുന്നു. കോവിഡ് പടരുന്ന പശ്ചാത്തലത്തില്‍ പ്രധാനമന്ത്രി നരേന്ദ്രമോദി 21 ദിവസത്തെ ലോക്ക്ഡൗണ്‍ പ്രഖ്യാപിച്ചതോടെ സ്വന്തം സംസ്ഥാനത്തേക്ക് മടങ്ങാന്‍ മറ്റു വഴിയില്ലാതായി.
മധ്യപ്രദേശിലെ മൊറീന ജില്ലയിലാണ് രണ്‍വീര്‍ സിങ്ങിന്‍െറ ഗ്രാമം. രാജ്യ തലസ്ഥാനത്തുനിന്നും 326 കി.മീ ദൂരം. ഭക്ഷണമോ വെള്ളമോ ഇല്ലാതെയായിരുന്നു നടത്തം. ഉത്തര്‍പ്രദേശിലെ ആഗ്രയിലെത്തിയപ്പോള്‍ അവിടത്തെ ചായക്കടക്കാരന്‍ നല്‍കിയ ചായയും ബിസ്ക്കറ്റും മാത്രമായിരുന്നു ദിവസങ്ങള്‍ക്ക് ശേഷമുള്ള ഭക്ഷണം. വീട്ടിലെത്താന്‍ 80 കിലോ മീറ്റര്‍ കൂടി താണ്ടിയാല്‍ മതിയായിരുന്നു. എന്നാല്‍ അതിനുമുന്നേ രണ്‍വീര്‍ സിങ്ങിന് ഹൃദയാഘാതം സംഭവിക്കുകയായിരുന്നു.
ഡല്‍ഹിയില്‍നിന്നും ആയിരങ്ങളാണ് കിലോമീറ്ററുകള്‍ താണ്ടി സ്വന്തം സംസ്ഥാനങ്ങളിലേക്ക് മടങ്ങുന്നത്.
കൈകുഞ്ഞുങ്ങളും സ്ത്രീകളടക്കമുള്ളവരാണ് നൂറിലേറെ കിലോമീറ്റര്‍ കാല്‍നടയായി സഞ്ചരിക്കുന്നത്.
യു.പി സര്‍ക്കാര്‍ ഇവര്‍ക്ക് നാട്ടിലേക്ക് മടങ്ങാന്‍ ബസുകള്‍ അയച്ചിരുന്നു. എന്നാല്‍ ഇതുവരെ പൂര്‍ണമായും അവ നടപ്പിലായിട്ടില്ല. ബസുകള്‍ക്കായി രാത്രി ഏറെ വൈകിയും ആനന്ദ് വിഹാര്‍ ബസ് സ്റ്റോപ്പില്‍ നൂറുകണക്കിന് ജനങ്ങള്‍ തടിച്ചുകൂടിയിരുന്നു. കോവിഡ് പ്രോട്ടോക്കോള്‍ പ്രകാരം കൂട്ടം കൂടി നില്‍ക്കാതെ സാമൂഹ്യ അകലം പാലിക്കണമെന്ന നിര്‍ദേശങ്ങള്‍ എല്ലാം അപ്രസക്തമാകുന്ന തരത്തിലാണ് ഇവിടത്തെ സംഭവങ്ങള്‍.
