ഗുവാഹത്തി: ഗോമൂത്രവും ചാണകവും ഉപയോഗിച്ച്‌ കൊറോണ വൈറസിനെ ഇല്ലാതാക്കാമെന്ന് ബിജെപി എംഎല്‍എ. ആസാമിലെ ബിജെപി എംഎല്‍എ സുമന്‍ ഹരിപ്രിയയുടേതാണ് പുതിയ പ്രസ്താവന. നിയമസഭാ സമ്മേളനത്തിലാണ് അവര്‍ ഇക്കാര്യം പറഞ്ഞത്.
കാന്‍സര്‍ പോലുള്ള മാരക രോഗങ്ങള്‍ ഭേദമാക്കാന്‍ ഗോമൂത്രവും ചാണകവും സഹായകമാണെന്നും അവര്‍ പറഞ്ഞു. ചാണകം വളരെ സഹായകരമാണെന്ന് നമുക്കെല്ലാവര്‍ക്കും അറിയാം. അതുപോലെ ഗോമൂത്രം തളിക്കുന്പോള്‍ അത് ഒരു പ്രദേശത്തെ ശുദ്ധീകരിക്കുന്നു. അതുപോലെ ഗോമൂത്രവും ചാണകവും ഉപയോഗിച്ച്‌ കൊറോണ വൈറസിനെ ഇല്ലാതാകാന്‍ കഴിയുമെന്നാണ് താന്‍ വിശ്വസിക്കുന്നുവെന്നും സുമന്‍ പറഞ്ഞു. കന്നുകാലി കടത്തിനെ കുറിച്ച്‌ നിയമസഭയില്‍ നടന്ന ചര്‍ച്ചയിലാണ് സുമന്‍ ഹരിപ്രിയയുടെ ഈ പ്രതികരണം. മതപരമായ ചടങ്ങുകള്‍ക്കിടയില്‍ ചാണകവും ഗോമൂത്രവും ഉപയോഗിക്കുന്നതിന് പിന്നില്‍ ശാസ്ത്രീയ കാരണങ്ങളുണ്ടെന്നും അവര്‍ പറഞ്ഞു. പശുക്കള്‍ വളരെ പ്രധാനമാണെന്നും സുമന്‍ ഹരിപ്രിയ കൂട്ടിച്ചേര്‍ത്തു.