തൃപ്പൂണിത്തുറയില്‍ ട്രേഡ് യൂണിയന്‍ സംഘര്‍ഷം. സി.ഐ.ടി.യു, ബി.എം.എസ്, ഐ.എന്‍.ടി.യു.സി തൊഴിലാളികള്‍ തമ്മിലാണ് ഏറ്റുമുട്ടലുണ്ടായത്. ഫ്‌ലാറ്റ് പണിയുന്നിടത്തെ തൊഴില്‍ തര്‍ക്കം സംഘര്‍ഷത്തില്‍ കലാശിക്കുകയായിരുന്നു. സംഘര്‍ഷത്തില്‍ മൂന്ന് തൊഴിലാളികള്‍ക്ക് പരുക്കേറ്റിട്ടുണ്ട്.
ട്രേഡ് യൂണിയന്‍ സംഘര്‍ഷം കനത്തതോടെ പ്രദേശത്ത് വലിയ പൊലീസ് സംഘമെത്തി സ്ഥിതിഗതികള്‍ നിയന്ത്രണവിധേയമാക്കി. ക്രമസമാധാന പ്രശ്‌നം നിലനില്‍ക്കുന്ന പശ്ചാത്തലത്തില്‍ ഫ്‌ലാറ്റിന്റെ നിര്‍മ്മാണം താല്‍ക്കാലികമായി നിര്‍ത്തിവെക്കാന്‍ നിര്‍ദേശം നല്‍കിയിട്ടുണ്ട്. സംഘര്‍ഷം സംബന്ധിച്ച് ലേബര്‍ ഓഫിസര്‍ മുന്‍പാകെ ഇന്ന് ഉച്ചയ്ക്ക് ചര്‍ച്ച നടക്കും. തങ്ങള്‍ക്കും തൊഴില്‍ ചെയ്യാന്‍ അവസരം വേണമെന്ന ആവശ്യമാകും ബി.എം.എസ് മുന്നോട്ടുവെക്കുക. 26 വര്‍ഷങ്ങള്‍ക്ക് മുന്‍പുള്ള ധാരണ പ്രകാരമാണ് ഇപ്പോഴും തൊഴില്‍ ക്രമീകരിച്ചിരിക്കുന്നതെന്നും ഈ നിലയില്‍ മാറ്റം വരണമെന്നുമാണ് ബി.എം.എസിന്റെ വാദം.