ജില്ലാതല വീഡിയോ ഫീച്ചര്‍ നിര്‍മ്മാണ മത്സരം: അവസാന തീയതി ഒക്ടോബര്‍ 15
ഗാന്ധിജയന്തി ആഘോഷങ്ങളുടെ ഭാഗമായി വിദ്യാഭ്യാസ വകുപ്പിന്റെയും വിദ്യാരംഗം കലാസാഹിത്യവേദിയുടെയും സഹകരണത്തോടെ കണ്ണൂര്‍ ജില്ലാ ഇന്‍ഫര്‍മേഷന്‍ ഓഫീസ് സ്‌കൂള്‍ വിദ്യാര്‍ഥികള്‍ക്കായി സംഘടിപ്പിക്കുന്ന വീഡിയോ ഫീച്ചര്‍ മത്സരത്തിന് ഒക്ടോബര്‍ 15 വരെ അപേക്ഷിക്കാം.
വീഡിയോ ഫീച്ചര്‍ നിര്‍മാണം ജില്ലാതലത്തില്‍ നേരിട്ടുള്ള മത്സരമാണ്. കഴിഞ്ഞ നാലര വര്‍ഷത്തിനിടെ നിങ്ങളുടെ ഗ്രാമത്തില്‍ (പഞ്ചായത്ത്/നഗരസഭ) നടന്ന മികച്ച ഒരു വികസന പദ്ധതിയെ കുറിച്ചുള്ള വീഡിയോ ചിത്രീകരിച്ചാണ് വീഡിയോ ഫീച്ചര്‍ മത്സരത്തിനയക്കേണ്ടത്. മൂന്ന് മുതല്‍ അഞ്ച് മിനുട്ട് വരെ ദൈര്‍ഘ്യമാവാം. ഫുള്‍ എച്ച് ഡി, എംപി 4 ഫോര്‍മാറ്റിലാവണം. ഹൈസ്‌കൂള്‍ വരെയുള്ളവര്‍ക്കും ഹയര്‍ സെക്കണ്ടറി വിഭാഗത്തിനും പ്രത്യേകമായാണ് മത്സരം. വിദ്യാര്‍ഥികള്‍ക്ക് ഒറ്റയ്‌ക്കോ സംഘമായോ മത്സരത്തില്‍ പങ്കെടുക്കാം. ചിത്രീകരിച്ച വീഡിയോ kannurprdcontest@gmail.com എന്ന മെയിലില്‍ അയക്കണം.
മെയില്‍ സബ്ജക്ടില്‍ വീഡിയോ ഫീച്ചര്‍ മത്സരം എന്ന് ചേര്‍ക്കണം. കൂടാതെ മത്സരാര്‍ഥിയുടെ/ടീം അംഗങ്ങളുടെ പേര്, വയസ്, സ്‌കൂള്‍, ക്ലാസ്, എന്നിവ ടൈപ്പ് ചെയ്ത് അയക്കണം. സ്‌കൂള്‍, ഹയര്‍ സെക്കണ്ടറി വിഭാഗങ്ങളിലെ മികച്ച ആദ്യ മൂന്ന് വീഡിയോക്ക് സമ്മാനം നല്‍കും. അവസാന തീയതി ഒക്ടോബര്‍ 15.