ആലപ്പുഴയില്‍ ഒറ്റയ്ക്കു താമസിച്ചിരുന്ന വയോധികയെ തെരുവുനായ കടിച്ചുകൊന്നു
ആലപ്പുഴയില്‍ ഒറ്റയ്ക്കു താമസിച്ചിരുന്ന വയോധികയെ തെരുവുനായ കടിച്ചുകൊന്നു
ആലപ്പുഴ: ഹരിപ്പാട്ട് വയോധിക തെരുവുനായയുടെ കടിയേറ്റു മരിച്ചു. പിലാപ്പുഴ വടയിക്കാട്ട് വീട്ടില്‍ പരേതനായ പരമേശ്വരന്‍ നായരുടെ ഭാര്യ രാജമ്മ (87) ആണ് തെരുവ് നായ കടിച്ചു കൊന്നത്.
ചൊവ്വാഴ്ച രാത്രി ഏഴുമണിയോടെയാണ് സംഭവം. എന്നും കൂട്ടുകിടക്കാന്‍ പോയിരുന്ന അയല്‍വാസി രാത്രിയില്‍ എത്തിയപ്പോഴാണ് ദേഹമാസകലം കടിയേറ്റ നിലയില്‍ വീടിനു സമീപം കിടന്ന രാജമ്മയെ കണ്ടത്. പറന്പില്‍ കൂട്ടിയിട്ടിരുന്ന കരിയിലക്കു തീ ഇടാന്‍ പോയപ്പോള്‍ തെരുവുനായ ആക്രമിച്ചതാണെന്നാണു കരുതുന്നത്.
തലയുടെ പിന്‍ഭാഗത്തും കൈയിലും ആരത്തില്‍ കടിയേറ്റിട്ടുണ്ട്. ഇവരുടെ വീടിന്‍റെ പറന്പ് കഴിഞ്ഞാല്‍ ഏറെ ദൂരത്താണു മറ്റു വീടുകളുള്ളത്. അതിനാല്‍ ആരും തന്നെ സംഭവം അറിഞ്ഞിരുന്നില്ല.
രാത്രിയില്‍ എത്തി വാതില്‍ മുട്ടിയിട്ടും കതക് തുറക്കാത്തതിനെ തുടര്‍ന്നു അയല്‍വാസി സമീപത്തെ വീട്ടിലെ ആളിനെ കൂട്ടി പരിസരത്തു തെരച്ചില്‍ നടത്തിയപ്പോഴാണ്, പരിക്കേറ്റ നിലയില്‍ ബോധരഹിതയായി രാജമ്മയെ കണ്ടത്. ഉടന്‍തന്നെ ഹരിപ്പാട് താലൂക്ക് ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല. അരൂര്‍ എല്‍പി സ്കൂളിലെ ഹെഡ്മിസ്ട്രസ് ആയിരുന്നു.