അമിത വില: ജില്ലയില്‍ 72 സ്ഥാപനങ്ങള്‍ക്കെതിരെ കേസ്
ലോക് ഡൗണിന്റെ സാഹചര്യത്തില്‍ ലീഗല്‍ മെട്രോളജി വകുപ്പ് വിവിധ വകുപ്പുകളുമായി ചേര്‍ന്ന് നടത്തിയ പരിശോധനയില്‍ അമിതവില ഈടാക്കിയ 72 സ്ഥാപനങ്ങള്‍ക്കെതിരെ കേസെടുത്തു. 1408 സ്ഥാപനങ്ങളിലാണ് പരിശോധന നടത്തിയത്.
കോവിഡ് 19 രോഗബാധയുടെ പശ്ചാത്തലത്തില്‍ മാസ്‌ക്, സാനിറ്റൈസര്‍, ഹാന്‍ഡ് ഗ്ലൗസ് എന്നിവയ്ക്ക് അമിതവില ഈടാക്കിയതിന് 25 മെഡിക്കല്‍ ഷോപ്പുകള്‍ക്കെതിരെയും കുപ്പിവെള്ളം ലിറ്ററിന് 13 രൂപയിലധികം ഈടാക്കിയതിന് 27 കടകള്‍ക്കെതിരെയും കേസെടുത്തു. നിലവില്‍ സര്‍ക്കാര്‍ അനുവദിച്ച സൗജന്യ റേഷന്‍ അളവില്‍ കുറവ് വില്‍പ്പന നടത്തിയതിന് 14 റേഷന്‍ കടകള്‍ക്കെതിരെയും കേസെടുത്തിട്ടുണ്ട്. പായ്ക്കറ്റുകളില്‍ കൃത്യമായ രേഖപ്പെടുത്തലില്ലാതെ വില്‍പ്പന നടത്തിയതിനും അളവുതൂക്ക ഉപകരണങ്ങളില്‍ മുദ്ര പതിപ്പിക്കാത്തതിനും ആറ് കേസുകള്‍ രജിസ്റ്റര്‍ ചെയ്തിട്ടുണ്ട്.
ജില്ലാ ഡെപ്യൂട്ടി കണ്‍ട്രോളര്‍ എസ് എസ് അഭിലാഷ്, അസിസ്റ്റന്റ് കണ്‍ട്രോളര്‍ ഇന്‍ ചാര്‍ജ്ജ് പി പ്രദീപ് എന്നിവര്‍ നേതൃത്വം വഹിച്ച പരിശോധനയില്‍ കെ കെ നാസര്‍, ആര്‍ കെ സജിത് കുമാര്‍, ടി സുജയ, പ്രജിന, കെ എം പ്രകാശന്‍, പി പി ശ്രീജിത്, പി കെ മനോജ്, ഇ വി ഹരിദാസ്, കെ എം ദിനേശന്‍, ടി പ്രജിത് കുമാര്‍ തുടങ്ങിയ ജീവനക്കാരും പങ്കെടുത്തു. പൊതുജനങ്ങള്‍ക്ക് പരാതികള്‍ സുതാര്യം മൊബൈല്‍ ആപ്ലിക്കേഷന്‍ വഴി അറിയിക്കാവുന്നതാണ്.