നല്ല ഒരു മീൻ കറി കൂട്ടാൻ ആരാണ് ആഗ്രഹിക്കാത്തത്. പ്രത്യകിച്ച് രുചിയിൽ മുൻ പന്തിയിൽ നിൽക്കുന്ന തിരുത വച്ചൊരു മീൻ കറി. തേങ്ങാപാൽ ചേർത്ത് കുടംപുളിയിട്ട് എരിവ് ചേർത്ത് തയാറാക്കുന്ന നല്ല ചുവന്ന നിറത്തിലുള്ള മീൻ കറിയുടെ സ്വാദ് ഒന്നുവേറെ തന്നെയാണ്. നല്ല തിരുത മീൻ കറി എങ്ങനെ ഉണ്ടാക്കാം എന്ന് നോക്കിയാലോ..
ആദ്യം മുളകുപൊടിയും മഞ്ഞൾപൊടിയും അര കപ്പ് വെള്ളം ചേർത്ത് മിക്സ് ചെയ്ത് പേസ്റ്റാക്കി മാറ്റിവെയ്‌ക്കണം. നിറം തോന്നാൽ കശ്മീരി മുളകു പൊടി ചേർക്കണം. ഒരു മൺച്ചട്ടിയിലേക്ക് 3-4 ടേബിൾ സ്പൂൺ വെളിച്ചെണ്ണ ഒഴിച്ച് ചൂടായ ശേഷം കടുകും ഉലുവയുമിട്ട് പൊട്ടിക്കുക. ഇതിലേക്ക് കറിവേപ്പിലയും വറ്റൽമുളകും നന്നായി അരിഞ്ഞെടുത്ത ചുമന്നുള്ളിയും പച്ചമുളകും ചേർത്ത് നന്നായി വഴറ്റുക. ആവശ്യമെങ്കിൽ കുറച്ചുകൂടി വെളിച്ചെണ്ണ ചേർക്കാം. നന്നായി വഴറ്റിയ ശേഷം മുളകുപൊടി, മഞ്ഞൾപൊടി പേസ്റ്റ് കൂടി ചേർത്ത് ചെറിയ തീയിൽ ഇളക്കുക. ആവശ്യമെങ്കിൽ കുറച്ച് വെള്ളം കൂടി ചേർക്കാം.
എണ്ണ തെളിഞ്ഞ് വരുന്നതോടെ മീൻ കക്ഷണങ്ങൾ മൂടി കിടക്കാൻ ആവശ്യമായ വെള്ളവും ഉപ്പ് പാകത്തിനും ചേർക്കുക. ഒപ്പം കഴുകി വച്ച കുടംപുളിയും ഇടുക. കറി തിളച്ചു വരുമ്പോൾ കുറച്ചു കൂടി കറിവേപ്പില ഇടുക. ഇതിലേക്ക് വൃത്തിയാക്കി വെച്ചിരിക്കുന്ന മീൻ കക്ഷണങ്ങൾ ചേർക്കുക. ചെറിയ തീയിൽ മീൻ 10 മിനിറ്റ് വേവിക്കുക. നന്നായി വറ്റിവരുമ്പോൾ പിഴിഞ്ഞു വെച്ചിരുന്ന തേങ്ങാപാൽ (ഒന്നാം പാൽ) ഒഴിച്ചു കൊടുക്കുക. വീണ്ടും ചെറിയ തീയിൽ കറി ഒന്നുകൂടി വറ്റണം. 5, 6 മിനിട്ടുകൾ കഴിയുമ്പോൾ തിരുത കറി കുറുകി കട്ടിയായി വരും.